ازاي تشتغلي عن طريق الفيسبوك وتعملي فلوس كتير.. للمبتدئين

السلام عليكم.. الموضوع اللي هنتكلم فيه النهاردة منتشر جدا في الفترة الحالية وهو البيع والشراء اونلاين وبالأخص عن طريق الفيسبوك ومواقع التواصل الاجتماعي، وفي كتير منكم بيبقى عايز يزود دخله جنب الدراسه او ست بيت عايزه تزود دخلها أو حد مش لاقي شغل فقرر يخلق البزنس بتاعه 😊 اول حاجه بتيجي على بال اي حد وخاصه البنات انها تجيب مثلا بضاعه زي الملابس او ميك اب او مفروشات وتبيعها عن طريق الفيسبوك لاصحابها والجيران والقرايب.. الموضوع اللي هتكلم فيه جايز تشوفوه مش جديد ولكن هتكلم عن ازاي تبتدي من الالف الى الياء تجارتك عن طريق مواقع التواصل الاجتماعي بدون اي مهارات من غير انجليزي من غير ما يبقى عندك خبره في اي برامج للمبتدئين مش محتاجه منك غير جهاز كمبيوتر وواصلت انترنت.. هحاول معاكم في الأسس اللي هنبتدي بيها حتى لو معكيش رأس مال اساسا تبتدي بيه.. الموضوع هيكون متقسم لأجزاء لسهولة الاطلاع.. 😎😎 كوبيه النسكافيه معاكي ☕ نيمتي العيال 😴 مزاجك رايق 😊 إذن يلا نبتدي.....

 ١. ادرسي نفسك..

 خدي بعضك في الركن البعيد الهادي واتكلمي مع نفسك ايه الحاجه اللي ممكن اشتغل فيها وتمشي ومع الوقت اقدر اتطور نفسي فيها.. خلي بالك من نقطه مهمة جداً.. انه لو هدفك بس تعملي فلوس مش هتستمري بمعنى انك هتلاقي نفسك بتجري ورا البيع وخلاص ودا في الغالب هيوقعك في مشاكل مع زباينك لو حد مثلا حب يسترجع حاجه.. انتي دلوقتي ماشيه ورا حلم بتكوينه وكيان متكامل كل خطوة فيه بتدل عليكي احلمي وكبري حلمك اتكلمي مع نفسك بصوت عالي.. انا بحب ايه.. وايه إمكانياتي.. الخطوه دي مهمه جدا لانه هتكتشفي في نفسك حاجات جميله وحماس داخلي جواكي هيبدا يظهر.. ودايما قولي لنفسك انا هاقدر اكون اللي بتمناه🌻🌻.

 ٢. ادرسي السوق..

 مينفعش مثلا تبيعي منتجات غاليه وتقولي عشان اكسب بسرعه.. لا لازم تفكري.. هل متوسط مرتبات الناس حواليكي كبير يخليهم يشتروا المنتج دا حتى لو غالي؟؟ هل المنتج دا ضروري للناس؟؟ هل في منافسين للمنتج دا جروبات تانيه مثلا.. هل المنتج له موضه زمنيه وينتهي.. هل المنتج دا منتشر بشكل كبير.. الناس محتاجه ايه.. ايه اكتر فئه عمريه هتعامل معاها وايه المنتجات اللي محتاجينها؟؟ كل الحاجات دي لازم تكون في دماغك من البداية..

 ٣. تحديد نوعيه المنتج أو الخدمه..

 خدمه!!! خدمه ايه يا ريهام 😨.. ايوه ممكن مثلا تكوني بتعرفي تترجمي تكتبي على الوردword أو صوتك حلو بتعملي اغاني بالطلب.. أو بتعزفي.. أو بترسمي.. كل دا خدمات بتتقدم بمقابل مادي وكل ما الناس عجبهم شغلك دا بيسوق ليكي بدون مجهود منك.. طب المنتج.. هنتفترض اني مثلا بحب الملابس والموضه هل هشتغل في الملابس بشكل عام.. لا هتحددي النوعيه ملابس الأطفال مثلا ولازم هنا تتأكدي أن دي الحاجه اللي بتحبيها واللي نفسياً قادره تشتغلي فيها.. يعني يا ريهام قولتلي ايه جديد!!! 😂😂 هقولك.. ملابس الأطفال منتشره حاولي تختاري صنف مش منتشر فيها.. زي مثلا الملابس التنكريه للأطفال زي شكل الفيل والضابط والديناصور بمعنى دوري على نوعيه منتج المنافسه فيه مش عاليه خاصه لو مبتدئه..دا هيميزك عن غيرك كتير.. وجروبك هيكون محط أنظار ناس كتير خاصه في الدراسه والحفلات..

 شربتي النسكافيه.. هاتي ورقه واكتبي أهدافك.. واستني الجزء التاني بإذن الله 💪💪

 الواجب بتاعك.. ارسمي في خيالك شكل لوجو الجروب بتاعك واسمه.. في رعايه الله..